- اقتباس :
- ويتم اتصال هاتفي في اليوم التالي مع السادات، ويعلق هيكل على كثرة الاتصالات الهاتفية من الجزائر أن الرئيس بو مدين كان يريد أن يطمئن،
الرئيس بومدين: سيادة الرئيس
الرئيس السادات: أيوه اهلا اهلا
الرئيس بومدين: مساء الخير
الرئيس السادات: يا مساء الخير يا أهلا يا أخ بومدين
الرئيس بومدين: كيف حالك
الرئيس السادات: الحمد لله
الرئيس بومدين: إحنا سمعنا ان العلم المصري موجود في المدينة بتاعة القنطرة
الرئيس السادات: آه خلاص والمحافظة هاتروح كمان
الرئيس بومدين: يا أخ الرئيس انا باتكلم معاك علشان نستخبر
الرئيس السادات: أيوه
الرئيس بومدين: ايه اخبارك؟
الرئيس السادات: الحمد لله كل خير
الرئيس بومدين: اليوم كان سخن أظن
الرئيس السادات: آه والله النهاردة كان لواءين مدرعين، انما الحمد لله ضربناهم واخذنا القنطرة، وبعدين كمان حرمتهم من البترول بتاعنا بتاع سيناء. حرقت البترول بتاعنا بتاع سيناء اللي عندهم يعني وجعتهم النهارده قوي. البترول بتاع سيناء اللي كانوا بياخدوه حرقته.
الرئيس بومدين: وايه الكلام بتاع رئيس اركان الحرب الصهيوني بيقول ان إحنا عملنا هجوم كبير اليوم على الجبهة الغربية
الرئيس السادات: ده كلامهم عنا وأنهم كسروا الجسور كلها، عاملين زي احمد سعيد (كان مذيعا في «صوت العرب» واشتهر بالمبالغة) زمان
الرئيس بومدين: أيوه
الرئيس السادات: (ضحك) الخسائر عندهم من اول يوم يا أخ بومدين خسائر كبيرة جدا وهم اللي دفعوا امريكا علشان عقد مجلس الأمن. ولكن لازم يعملوا حرب الدعاية دي. هم بيحاربوا بالدعاية لكن احنا بنحارب فعلا على الأرض.
الرئيس بومدين: انتم اخذتم جماعة منهم اليوم
الرئيس السادات: نعم
الرئيس بومدين: انتم ما أخذتم أسرى اليوم
الرئيس السادات: لا أخذنا اليوم. المجموع كله بلغ لغاية النهارده 120 لكن القتلى كتير قوي
الرئيس بومدين: وأخذتم دبابات كمان
الرئيس السادات: وأخذنا دبابات AMX وسنتيريون
الرئيس بومدين: نعم بس علشان نطمئن
الرئيس السادات: لا اطمئن ما فيش حاجة ابدا وكل خير وها ابعت لك ان شاء الله من الدبابات دي
الرئيس بومدين: (ضحك)
الرئيس السادات: (ضحك) ها أبعت لك هدية للجيش الجزائري علشان يحطوه عندهم
الرئيس بومدين: كتر خيرك
الرئيس السادات: (ضحك)
الرئيس بومدين: والله أنتم رفعتولنا رأسنا
الرئيس السادات: الله يحفظك
الرئيس بومدين: كيف إخواننا في سوريا؟
الرئيس السادات: والله انا قاعد بأتتبع الموقف يا أخ بومدين ومستني تقرير يجيني
الرئيس بومدين: نعم
الرئيس السادات: مستني تقرير يجيني، لكن هم كانوا مركزين عليهم من الصبح، مركزين جدا
الرئيس بومدين: لكن الظاهر انهم اسقطوا عددا لا بأس به من الطائرات
الرئيس السادات: الحقيقة أسقطوا عدد كويس جدا
الرئيس بومدين: نعم
الرئيس السادات: الحقيقة
الرئيس بومدين: واليهود بيقولوا انهم استرجعوا الخطوط الاولى
الرئيس السادات: بتاعة الجولان
الرئيس بومدين: آه
الرئيس السادات: أنا بعت، لكن زي ما قلت لك هم بيعملوا حرب في الراديو زي زمان، لكن انا بعت استوثق من الكلام ده يعني مش سهل.
الرئيس بومدين: وأنتم أخذتم الضفة الشرقية كاملة
الرئيس السادات: الآن خلاص. دا أنا حتى ها أدي امر علشان نبدأ تطهير القناة
الرئيس بومدين: (ضحك)
الرئيس السادات: (ضحك)
الرئيس بومدين: ندي الخبر هذا للاذاعة الخارجية
الرئيس السادات: اعطيه والله صحيح انا حا ادي امر علشان يبدأوا التطهير
الرئيس بومدين: والله انا مسرور جدا يا أخ أنور
الرئيس السادات: الحمد لله ما هم كانوا عايزين نستأذن اسرائيل في فتح القناة
الرئيس بومدين: نعم
الرئيس السادات: لا بقى
الرئيس بومدين: نعم. هم الآن يقنبلوا في بورسعيد أظن
الرئيس السادات: ضربوا بورسعيد اليوم لكن بقى انا بعت لمجلس الامن علشان ده ضرب مدن
الرئيس بومدين: نعم
الرئيس السادات: لكن انا اطمنت، الحالة قبل ما تكلمني بخمس دقائق كل حاجة ماشية كويس
الرئيس بومدين: طيب الحمد لله يا أخ الريس
الرئيس السادات: تصبح على خير
الرئيس بومدين: تصبح على خير
الرئيس السادات: في أمان الله
موضوع: رد: حرب أكتوبر: الرجال وأنصاف الرجال (2) : محاضر اتصالات السادات وبومدين وتعليقي عليها 
السبت أكتوبر 03 2015, 21:37